" نیبه "
" نیبه "
شیون فومنی
دس دسی تنگه نوکون تی چومه بادامی نیبه
ئه لعاب ایسفرزه امرأ تی کوکو شامی نیبه
فیلی امرأ صحرا دامانه نشأ هیسته کودان
تشنگی امرأ امی ستّار زئن خامی نیبه
می مانستن تو اگه بند سلیمان بورسَنی
ده بوزه لافند فارَس گونجه گاوه سهمی نیبه
حرص و جوش خوردَن نوأ می سر اگر بشکفته نا
روسوایی دوست داشتنه شین ، اسم بندامی نیبه
نَهره پیش غافل نوا نیشتَن بدار آبه جیگیر
دریا دونبال سر دوبستن بی سر انجامی نیبه
لخت آیه دونیا ایروز لختم واسی فردا بشه
کیسه کش دلاکه ، دلاکم کی حمامی نیبه
خودنویسه ، جوهر امرأ واسی "کاری" کودَن
ورده امرأ بایزیدم شیخ بسطامی نیبه
اهل زرق و برقه ده بیخود نیه شهری گولاز
کامه ران تا سادگی دیمه ننه کامی نیبه
صد هزار من مثنوی "شیون" دروغ چاپه زنه
مردوم امرأ اگر روراست نبه ، نامی نیبه
gilezakan